९० कोटींच्या कर्जात बुडाले होते 'बिग बी' अमिताभ बच्चन....
९० कोटींच्या कर्जात बुडाले होते 'बिग बी' अमिताभ बच्चन यांनी आयुष्यात केवळ यशच पाहिले नाही, तर घोर अपयशाची चवही चाखली आहे. आपल्या कारकिर्दीच्या एका टप्प्यावर ते यशाच्या शिखरावर असतानाच, ९० च्या दशकात त्यांनी व्यवसायात पाऊल टाकले. त्यांनी 'एबीसीएल' (Amitabh Bachchan Corporation Limited) ही कंपनी सुरू केली होती. मात्र, दुर्दैवाने ही कंपनी अपेक्षित यश मिळवू शकली नाही आणि अमिताभ बच्चन भयंकर आर्थिक संकटात सापडले.
एका मुलाखतीत सांगितल्याप्रमाणे, त्या काळात त्यांच्यावर तब्बल ९० कोटी रुपयांचे कर्ज झाले होते. परिस्थिती इतकी बिकट होती की, लोक त्यांच्याकडे पैसे मागायला घरी येऊ लागले होते आणि ते दिवाळखोरीच्या उंबरठ्यावर पोहोचले होते.कष्टाने भरली पुन्हा भरारी एवढ्या मोठ्या कर्जाच्या बोजाखाली दबल्यानंतरही अमिताभ बच्चन डगमगले नाहीत किंवा खचून गेले नाहीत. त्यांनी वयाच्या पन्नाशीनंतर पुन्हा नव्याने सुरुवात केली. या कठीण काळात त्यांनी येईल त्या भूमिकेला न्याय देण्याचे ठरवले. दिवसरात्र मेहनत करून, अपार कष्ट करून त्यांनी एक-एक पैसा जमवला आणि आपले सर्व कर्ज फेडले. यश चोप्रांच्या 'मोहब्बते' चित्रपटाने आणि टीव्हीवर 'कौन बनेगा करोडपती'ने त्यांना पुन्हा उभारी दिली.
वयाच्या ८३ व्या वर्षीही तरुणांना लाजवणारा उत्साह आज वयाच्या ८३ व्या वर्षीही अमिताभ बच्चन यांचा कामाचा उत्साह एखाद्या तरुणाला लाजवेल असा आहे. आजही ते इंडस्ट्रीमध्ये तितकेच सक्रिय आहेत. 'कौन बनेगा करोडपती' (KBC) या शोचे ते गेली अनेक वर्षे यशस्वी सूत्रसंचालन करत आहेत, ज्यामधुन ते घराघरात पोहोचले.
नुकतेच 'कल्की २८९९ एडी' (Kalki 2899 AD) या चित्रपटात त्यांनी साकारलेल्या 'अश्वत्थामा'च्या भूमिकेचे सर्वत्र भरभरून कौतुक झाले. आजही ते अविरत काम करत असून हार न मानता संकटांचा सामना कसा करावा, याचे उत्तम उदाहरण त्यांनी तरुण पिढीसमोर ठेवले आहे.
